Səttar Bəhlulzodə

Səttar Bəhlulzodə (bitovə nom: Səttar Bəhluli zoə Bəhlulzodə) — Azərbojčoni rəssamə məktəbi ən gorkinə nymojəndənədə gyləj, Azərbojčoni oko doə inčəsənəti xodim (1960), Azərbojčoni xəlǧi rəssam (1963), Azərbojčon SSR kišvəri mykofoti lauriat (1972).

Səttar Bəhlulzadə

Žimon

Səttar Bəhlulzodə 15 dekabr 1909-nə sorədə cy Boku Əmirčan diədə moəku bə. 1927-ə sorədə rəssoməti məktəb, 1931-i sorədə Ozorbojčoni rəssomə məktəb, 1933 - ə sorədə sə Moskovə dövlət rəssomə institut ǧəbul bə. 1941-ə sorədə V.İ. Surikovi nomədə Məskovə rəssoməti insitut orxinjə.

Məhšurə rəssamon V.A.Favorski ijan G.M. šagalin tələbə bə. Bə ofəjomonəti "Kommunist" ružnomədə dy Əzim Əzimzodə joliəti omə. 1931-1933-ə soronədə bə dövri həxədə karikaturaž cap kardə bə.

Səttar Bəhlulzodə dy kərə sə okədoə pərcəmi ordeni ijan dy medalon təltif bə.

Əsəronyž R.Mustafajevi nomədə Ozorbojčoni dövləti inčəsətə muzejədə ijan Ozorbojčoni dövləti šikilə ǧalerejədə, žəgoən Məskovədə ijan čo šəhəron muzejonədə ogətə bedə.

Bəhlulzodə 14 oktjabr 1974-nə sorədə Məskovədə vəfot šə.Əmirčani diədə bə xok aspardə bə, cəj ǧəvi səpi abidə rost kardəžone.

Mykofoton

Ozorbojčani SSR dövləti mikofoti lauriat-1972

Ofəjəmon

Məskovədə ogardə bə peštə cy Bəhlulzodə ofəjəmonətiədə tarixi mövzuon ijan tarixi šəxsijjəton təsfir ("Boboki üsjon"."Fətəli xan", Xəttot Mir Əli ijan čo.) məxsusi vyrəž gətə.

Daveku bə pešo soronədə Bəhlulzodə cy Abšeroni natə mədənon,bog ijan dion təsfir kardə rəsmoniž kəšə.

cy Bəhlulzodə ofəjəmonədə bə təbiəti təsfiron še-še maraǧ zümand bə,cə cənzəron žanrədə hənijan cokə əsəronyž ofəjə kardə. 1946-1947-ə sorədə soronədə cy Respublikə bədiə sərgionədə Bəhlulzodə bə Abšeroni aid əsəron ("Byzovnədə natə mədənon", "Əmirčan ijan čo.) nišo doə bə.

cy Bəhlulzodə ve zəhmətinə ofəjəmoni məhsul bə "Kaspo səpe šəv", "Əbədi məšəlon" , "Kəpəzi cašə arson", "Vətəni bahar", "Ozorbojčoni nəǧyl", "Suraxani atəšgah", "Əfsonə zamin", "šahnəbot", "Nəxcivan", "šamavəsəj Ordubadi boǧonədə", "Bokuədə otəšfošonəti", "gudjala ru", "Əmirčon", "Natə syǧon" ijan čo əsəronyž əsas vyrə gətedə. Əcəj mənzəron-pejzažonədə, intimə-lirikə natrünotonədə, cy xolcə recynə ornomenton dəcynjənon əks kardə xəlǧi ofojomonəti motivon hiss karde bedə. cy Bəhlulzodə məxsusə sərgion Əlčəzair, Misir, Livon, Surija, Tunis, Norveč, ADR, Kuba, Finlandija,Fransa, japonija ijan dynjo candə čo dövlətonədə edoštə bən.

Dynjo candə gylə muzejonədə cy Səttar Bəhlulzadə əsəron daima eksponat hisob bedən.

Filmografija

1. Toǧrul Nərimanjov (film 1966) - İštirak (Kyrtəmetražə sənədinə tilvizija film)

2. Im Səttar Bəhlulzodəje (film 1969) - İštirak (Kyrtəmetražə sənədinə tilvizija film)

3. Se hekajə (film 1974) - Arxivi kadron (Kyrtəmetražə sənədinə tilvizija film)

4. Səttar Bəhlulzodə (film 1988) - Arxivə kadron (Kyrtəmetražə sənədinə film)

5. Oxynnə dərviš (film 2009)