Numunə:Vyžnijə məǧolə

Kuəzingi nəǧyl kəšə rəsm

Tolyšə xəlǧi nəǧylon — tolyšə xəlǧi šifohi ofəjevonəti əsəron.
Har xəlǧi nəǧylon ijən əfsonon — rufi mədənijəti gyləj əhmijətinə poən, kom bənə xəlǧi šifohi ofəjevonəti čo nymunon cy etnosi šuuri təmsil kardejdən. Bə əmə rəsə tolyšə nəǧylon ijən əfsonon Avestəku rišə pegətəšone, taryxi vərəǧonku dəvardən ijən tolyšə mədənijətədə ve barzə vyrə gətejdə. Əvon handəkəson hele kardejdən odəmə səbarzi, rufi sərvəton ijən pokə ešǧi hisson ogəte, kom lap aktuale cəmə vaxtədə, əvon tovsijə kardejdən xošxosjətəti ijən humanizmi barz kardejdən. Tədǧyǧotəvonon de tolyšə folklori hələ XIX əsrədə həmrəǧ bejdəbin. Iminə tolyšə folklori nymunon dijə karde bəbe cy miəllimi Tejmurbek Bajraməlibekovi əsəronədə, məsələm 1894—1899 soronədə «Ǧafǧazi tojfon ijən vyron təsvir kardə məčmuə». Bajraməlibekovi se gylə məǧolonədə tolyšə nəǧylon, əfsonon ijən bovon barədə nyvyštyše.
Tolyšə nəǧylonədə čurbəčurə personažon hestin: Div, Alažen, Alamerd, Ivyžəli, Əždəho, aǧylmandə həjvonon, igidə zoon komon yštəni divon dastonku peroxnijedən, zyrəkə vəju ki de yštə aǧyli iškilon həl kardejdə. Žygo həmmə tolyšə nəǧylon ǧədimiku bə ysət cəmə əčdodon mydrikəti nišon dojdə. (bə dumo dəvarde...)