Tolyšə folklor gyrdə kardə bejdə

Yn devrədə bə tolyši folklori gyrdəkarde, nəšr karde vej zu doə byə. Iminə dəfə yn sahədə Zulfuǧari Əhmədzadə “Syə Tolyš” gəzetədə gyləj vəzminə məgalə cap kardedə. (“ST” N-59 (252) 30.11.1934) Sori bədigə bə muəllimon, rušinfikon, šogirdon, tələbon ovardemon dərč bedə: “ Syə Tolyš” gəzetə cy ružiku bəpeštə eli ədəbijati yštə səhifonədə rušin kardedə. Bəcəj gorošən tolyšə eli ədəbijati gyrdə karde-karde bə “Syə Tolyši” redaksijə vyǧande muəllimonku, məktəbi tələbonku ijən həmmə həvəskoronku xahiš kardəmon” ( “ST”, N- 60 (318) 19.10.1935) Azərbojčoni har vyrədə gešə hərəkət rost be ki, tolyšə folklorə nymunon bə gəzetə vyǧandə bybu. Folklorə hərəkot həmməj gafgazi əhatə kardedə. By sahədə Zagafgazijə olimpiada təsis bedə. Bə Zagafgazijə olimpiədə əšiə ženon tərəfo hozy kardəbyə eli mahnejonən dərč bedə gəzetonədə:

Gyləj syə sefim dojim bəšədə, Ha gylym, ha gylym, ha laj-laj xanym. Cangəj rəjhon əbim jojym kəšədə, Ha vylym, ha vylym, halaj, aj xanym... ( gyrdə əkə: İ. Bəširov. “ST” N- 61 (319) 04.11. 1935)

Umumən tolyšə folklori gyrdə kardeədə Isag Bəširov, Mirzəli Sadygov, Mamustavyž Səjjarə Guədovə vej aktivəti nišon dojdən. Mangi bədigə cy Muzəffər Nəsirli bə tolyšə ičtimaijəti vej ošnə byə məšhurə sanbalinə məǧoləš dərč bedə «Syə Tolyš» ružnomə 2 numrədə: «Tolyšə folklori həxədə can gyləjni syxan» (dijəkə: “ST” 67 ( 325) 18.12.1935 – N- 69 (327) 31.12.1935) Yn məǧolə pešo bəštə muəllifi sə bəlo vardedə, Muzəffər Nəsirli ittiham kardejo alət bedə.